Jonin bergan jigarlarim

Vatan uchun jonin bergan jigarlarim,
Hurlik uchun qonin bergan jigarlarim,
Xoinlarni itday qirgan jigarlarim,
Unutmaydi nomingizni ona Vatan.

Volidangiz: «Farzandimdan roziman» — der,
Rizoligin aytar sizga shu ona yer,
Ey, Boburjon, ey, Ulugʻbek, ey Alisher,
Nomingizni unutmaydi ona Vatan.

Ortingizda o'zbek degan millat qoldi,
O'zbekiston degan ulugʻ davlat qoldi,
Sizdan meros jasoratu shiddat qoldi,
Sizni aslo unutmaydi ona Vatan.

Siz tufayli uyim tinchdur, baxtim omon, Siz tufayli kunlar kelar dorilomon,
Ey G'afurjon, ey Mahmudjon, ey Elomon,
Unutmaydi, unutmaydi sizni Vatan.

Sadoqatni jo aylab siz dilingizga,
Belbog` boylab shijoatdan belingizga,
Ko'ʻkragingiz qalqon bo'ldi elingizga,
Sizni abad unutmaydi ona Vatan.

Toki o'zbek, O'zbekiston dunyoda bor —
Sizlar ila qilar faxr va iftixor,
Ey Qahramon, ey Ma'rufjon, ey Sayyor,
Unutmaydi, unutmaydi sizni Vatan.

Haqqingizga duo aytar Temur bobo,
Duo aytar To'marisdek qutlugʻ momo,
Duo aytar qoningizni ichgan giyoh,
Unutmaydi nomingizni ona Vatan.

Endi sizga Alpomishlar yoʻldoshu yor,
Endi sizga abadiyat aytar alyor,
Ey Yunusbek, Abduxalil, ey Doniyor,
Unutmaydi, unutmaydi sizni Vatan.

Vatan uchun shahid ketgan jigarlarim,
Or-nomusni baland tutgan jigarlarim,
Abadiyat sari ketgan jigarlarim,
Unutmaydi nomingizni ona Vatan.

Vatan chegaralarini himoya qilib qurbon boʻlgan Oʻzbek oʻgʻlonlari xotirasiga bag'ishlandi.