Жонин берган жигарларим

Ватан учун жонин берган жигарларим,
Ҳурлик учун қонин берган жигарларим,
Хоинларни итдай қирган жигарларим,
Унутмайди номингизни она Ватан.

Волидангиз: «Фарзандимдан розиман» — дер,
Ризолигин айтар сизга шу она ер,
Эй, Бобуржон, эй, Улуғбек, эй Aлишер,
Номингизни унутмайди она Ватан.
Ортингизда ўзбек деган миллат қолди,
Ўзбекистон деган улуғ давлат қолди,
Сиздан мерос жасорату шиддат қолди,
Сизни асло унутмайди она Ватан.

Сиз туфайли уйим тинчдур, бахтим омон,
Сиз туфайли кунлар келар дориломон,
Эй Ғафуржон, эй Маҳмуджон, эй Эломон,
Унутмайди, унутмайди сизни Ватан.

Садоқатни жо айлаб сиз дилингизга,
Белбоғ бойлаб шижоатдан белингизга,
Кўъкрагингиз қалқон бўлди элингизга,
Сизни абад унутмайди она Ватан.

Токи ўзбек, Ўзбекистон дунёда бор —
Сизлар ила қилар фахр ва ифтихор,
Эй Қаҳрамон, эй Маъруфжон, эй Сайёр,
Унутмайди, унутмайди сизни Ватан.

Ҳаққингизга дуо айтар Темур бобо,
Дуо айтар Тўмарисдек қутлуғ момо,
Дуо айтар қонингизни ичган гиёҳ,
Унутмайди номингизни она Ватан.

Энди сизга Aлпомишлар йўлдошу ёр,
Энди сизга абадият айтар алёр,
Эй Юнусбек, Aбдухалил, эй Дониёр,
Унутмайди, унутмайди сизни Ватан.

Ватан учун шаҳид кетган жигарларим,
Ор-номусни баланд тутган жигарларим,
Aбадият сари кетган жигарларим,
Унутмайди номингизни она Ватан.

Ватан чегараларини ҳимоя қилиб қурбон бўлган Ўзбек ўғлонлари хотирасига бағишланди.