Қайнона ойимлар ва келинжонларга

Ҳовлингизга тушди янги келинчак,
Оҳу каби ҳуркак, нозик, навниҳол.
Шу нозик вужуднинг шарофатидан
Уйингизга файз ҳам киради дархол.

Неча йил бағрида авайлаб боққан
Қизин сизга она ташлаб кетади.
Кўнгил узолмасдан жон жигаридан,
Кўзларини намлаб, ёшлаб кетади.

Ғунчаси, навдаси, ниҳоли унинг
Қандай боғ, боғбоннинг қўлига тушди?
Палохмон тошидай отилган қизи,
Қайга учиб, қандай маконга тушди?

Чой узатган қўли титраб туради,
Жавдираб қарайди кўзларингизга.
Сиз уни авайланг, қўллаб қувватланг,
Юзларини босинг юзларингизга.

Гаплашиб ўтириб мудраб қолади,
Уйқуга тўймаса дам беринг бир оз.
Маза қилиб сурсин келинлик даврин,
Баланд осмонларда қилсин у парвоз.

Келинликдир Бедил китобдан қийин,
Бу китоб шунчалик қийин эдими?
Мирзо Бедил! Келинларни қийнамай,
Осон китоб ёзсанг бўлмас эдими?

Эр эпламоқ осон, этик тортишчи...
Ҳозир этик кияр қайси эр киши?
"Этик тортиш" деса кўзда тутилган,
Бола - чақа, турмуш, рўзғор юмуши.

Қайнонанинг йўриқларида юриб,
Шуларни эпласа - қарқара келин.
"Ўзим биламан" деб шалтоғи чиқса,
Элу юрт олдида масхара келин.

Ширин неваралар ҳадя этганда,
Дуо қилинг "Умрингиз узун бўлсин"- деб.
"Ўғлим билан бахтли ҳаёт кечиринг,
Уйингиз, жойингиз нурга тўлсин" деб.

Аста секин уй жойингиз эгаллар,
Невара киради ётоғингизга.
Шуларни деб баъзан қарай олмайсиз
Неча йиллик турмуш ўртогингизга.

Пулингиз қанчаю қаерда турар?
Қайси рўмолингиз қай кўйлакка мос?
Қайнота хуш кўрган таом қайсидир?
Бари назаридан бир четда қолмас.

Уйим шунга қолиб кетяпти деманг,
Майли, эга бўлсин, унга ҳовли, жой.
Бизга нима керак? Битта ширин сўз,
Яхши тотли таом, бир пиела чой.

Бу дунёни қайтар дунё дейдилар,
Сизнинг қизларингиз бир жойда келин.
Келинга нимаики қилган бўлсангиз,
Қудадан қизингизга қайтади, билинг!

Келин яхши бўлса бераркан Худо,
Келин ёмон бўлса ураркан Худо.
Ҳеч кимни урмасин, ҳаммага берсин,
Сийлаи раҳм қилганни суяркан Худо.

Яхши келин қиздан ортиқ бўларкан,
У Аллоҳдан сизга тортиқ бўларкан.
Узоқдан қизингиз етиб келгунча,
Кунингизга шу келинлар яраркан.

Ой келинлар! Фарзанд ўстиряпсиз сиз,
Эртага ўзингиз қайнонадирсиз.
Қайнона - қай она деманг хеч маҳал,
Келиндан қайтмасин ҳар бир сўзингиз.

Доим кулиб юринг, бу - бахт калити,
Қайнонага беринг жон - жонингизни.
У доим сиз тараф! Буни унутманг!
Ҳеч ҳам ёни бўлмас эржонингизни.

Майли, баъзан қовоғидан қор ёғсин,
Сиз ҳеч аразламанг, кўнглига қаранг.
Ахир у ҳам инсон, асаблари бор,
Ҳозир ҳаммамизда асаблар таранг.

Севган ёрингизни шу аёл туғиб,
Тарбиялаб, топширган қўлингизга.
Яхши эрингизни яхши ўстирган,
Шугина муштирар қайнонангизда.

Ота уйингизга бош эгиб бориб,
Келинликка сизни танлаган - ўша.
Ўғли "Уйланмайман бу қизга"-  деса,
Яхшингиз ошириб мақтаган - ўша.

Алохида чиқишни орзу қилманг,
Қайнона борлиги бу - давлатингиз.
Уйингизнинг файзи, фариштаси у,
Ахир ёнингиздаку жаннатингиз.

Вақт борида дуосин олиб қолинг,
Дуо билан униб ўсади инсон.
Бемор бўлса қаранг, суянчиқ бўлинг,
Соғлигида сирдош, дарддош, меҳрибон.

Ўргатганин тингланг жон қулоқ билан.
Эртага маслахатчи топа олмайсиз.
Келинжон! Ақл билан иш кўринг доим.
Қайнонани улугланг! Кам бўлмайсиз!

Қайнота, қайнона қайни сингиллар.
Бўлсинлар ҳар доим ардоғингизда.
Қайнопа, қайноға,  қайниукалар.
Улар сизнинг тотли қаймоғингизда.

Овсинингиз бўлса опажоним денг
Сизга кўп нарсани ўргатар улар.
Шу айтганларимга қулоқ тутсангиз.
Келинжон, албатта бахтингиз кулар.