Yoshlar madhiyasi

Yoshmiz, dilimizda ezgu ahd bo'lgay,
Har yurakda shiddat bo'lgay, shahd bo'lgay!
Yurtboshimiz ko'rsatgan yorugʻ yo'lda,
Manzilgacha yo'ldoshimiz baxt bo'lgay!

Vatan bizdan kutmoqda buyuk ishlar,
Bu ishonchdan jo'shar ishtiyoqimiz!
Bunda jamdir Barchinoy, Alpomishlar,
Ko'ksi baland «Yoshlar ittifoqi»miz!

Har ko'ngilni chaman etmoq uchun ham,
Gullashaylik, O'zbekiston yoshlari!
Buyuk kelajakka yetmoq uchun ham,
Birlashaylik, O'zbekiston yoshlari!
To'qqiz yoshda Qur'onni yod bilgan kim?
Eng ulugʻ muhaddis — Buxoriy bobo!
Yetti yoshida “Mantiq ut-tayr”ni,
Yod olgan kim? Bizning Navoiy bobo!

Bolalikdan asov otni egarlab,
Doim zafar quchgan Temur bobomiz!
O'n ikki yoshida taxtni egallab,
Yurt boshqargan bizning Bobur bobomiz!

Ajdodlardek yorugʻ yuz bo'lmoq uchun,
Nurlashaylik, O'zbekiston yoshlari!
Dunyo ko'rib qo'ysin biz yoshlar kuchin,
Birlashaylik, O'zbekiston yoshlari!

Bu kun jahon maydonida ko'p yoshlar,
Bo'lmoqdalar ajdodlarga munosib!
Ular yurtni marralar sari boshlar,
Beruniylar bosgan izlarni bosib!

Yurt bayrog'in Kubroday mahkam tutib,
Yuksaklarga qadar uchgan yoshlarmiz!
Boradirmiz, turmaymiz baxtni kutib,
Har jabhada zafar quchgan yoshlarmiz!

Dunyo bilan barcha tilda birma-bir,
Tillashaylik, O'zbekiston yoshlari!
Vatan qadrin birdamlik ko'targaydir,
Birlashaylik, O'zbekiston yoshlari!

Botirjon Ergashev.