Ёшлар мадҳияси

Ёшмиз, дилимизда эзгу аҳд бўлгай,
Ҳар юракда шиддат бўлгай, шаҳд бўлгай!
Юртбошимиз кўрсатган ёруғ йўлда,
Манзилгача йўлдошимиз бахт бўлгай!

Ватан биздан кутмоқда буюк ишлар,
Бу ишончдан жўшар иштиёқимиз!
Бунда жамдир Барчиной, Aлпомишлар, Кўкси баланд «Ёшлар иттифоқи»миз!

Ҳар кўнгилни чаман этмоқ учун ҳам,
Гуллашайлик, Ўзбекистон ёшлари!
Буюк келажакка етмоқ учун ҳам,
Бирлашайлик, Ўзбекистон ёшлари!

Тўққиз ёшда Қуръонни ёд билган ким?
Энг улуғ муҳаддис — Бухорий бобо!
Етти ёшида “Мантиқ ут-тайр”ни,
Ёд олган ким? Бизнинг Навоий бобо!

Болаликдан асов отни эгарлаб,
Доим зафар қучган Темур бобомиз!
Ўн икки ёшида тахтни эгаллаб,
Юрт бошқарган бизнинг Бобур бобомиз!

Aждодлардек ёруғ юз бўлмоқ учун,
Нурлашайлик, Ўзбекистон ёшлари!
Дунё кўриб қўйсин биз ёшлар кучин,
Бирлашайлик, Ўзбекистон ёшлари!

Бу кун жаҳон майдонида кўп ёшлар,
Бўлмоқдалар аждодларга муносиб!
Улар юртни марралар сари бошлар,
Берунийлар босган изларни босиб!

Юрт байроғин Кубродай маҳкам тутиб,
Юксакларга қадар учган ёшлармиз!
Борадирмиз, турмаймиз бахтни кутиб,
Ҳар жабҳада зафар қучган ёшлармиз!

Дунё билан барча тилда бирма-бир,
Тиллашайлик, Ўзбекистон ёшлари!
Ватан қадрин бирдамлик кўтаргайдир,
Бирлашайлик, Ўзбекистон ёшлари!

Ботиржон Эргашев.