JINSIY MAYL NIMA SABABDAN SUSAYADI?

— Yosh katta bo‘lgani sayin har bir erkakda jinsiy mayl susayib boradi. Lekin ba’zi bir kasalliklar yoki holatlar tufayli ham ushbu muammo yuzaga keladi. Misol uchun, eng ko‘p uchraydigan muammolardan biri — bu o‘ta semizlik. 

    Metabolik o‘zgarishlar sababli semizlik paydo bo‘lganda, organizmda gormonlar o‘zgarishi ro‘y beradi. Bunday paytda jinsiy gormonlar ishlab chiqarish kamayadi va o‘z nav­batida, jinsiy mayl susaya boradi. Ayrim erkaklarda bu holat kuzatilishiga genetik moyillik sabab bo‘ladi. 

    Erkaklarning temperamenti har xil ko‘rinishga ega. Deylik, bir erkakda bir haftada 6-7 marta yaqinlikka talab bo‘lsa, boshqa erkakda bu ko‘rsatkich bir haftada bir marta bilan kifoyalanishi mumkin. U holat ham, bu holat ham me’yoriy hisoblanadi. Biri temperamenti yuqori odamning, ikkinchisi esa temperamenti past odamning ko‘rsatkichi. Temperamenti yuqori erkaklarda bu jarayon kechroq boshlansa, aksincha, temperamenti past kishilarda bu muammo erta namoyon bo‘ladi. 
    Bir haftada bir marta aloqa qiladigan kishini kasal deyish noto‘g‘ri. Chunki bu uning uchun me’yor hisoblanadi. Biroq faol jinsiy hayotda yashagan erkak birdaniga passivlashib qolsa, bu muammoli. 

    Shuningdek, qandli diabetda sezuvchanlikning kamayishi, qon tomirlar ichida qon aylanishining buzilishi hisobiga jinsiy mayl susayishi mumkin. Turli jarohatlanishlar, psixologik o‘zgarishlar, qo‘rqish, stresslar, sezuvchanlikning buzilishi, asab tizimi kasalliklari sababli ham jinsiy mayl susayadi. 

   Yodingizda bo‘lsin, erkakning biror tashvishi bo‘lsa, o‘y-xayollari unga tinchlik bermasa ham yaqinlik ko‘ngildagidek bo‘lmaydi va shu sababli moyillik so‘nib boradi. Shunday ekan, erkak imkon qadar yaxshi kayfiyatda yurishga harakat qilishi kerak.