MUROSASIZ KЕLINLARDAN DOD!

Onam o‘lsa "dod!" demaganman,
Erim ursa "dod!" demaganman,
Bir savdodan kuydi jonu tan,
Murosasiz kelinlardan dod!

Nima ekan bilmadim siri,
Olayadi biriga-biri,
Xech bo‘lmasa do‘st emas tili,
Murosasiz kelinlardan dod!

Chimirilib turgani qaysi,
Qovoq solib yurgani qaysi,
Bolasini urgani qaysi,
Murosasiz kelinlardan dod!

Bir-birini siltalagan chog‘,
Yuragimga sanchilar pichoq,
O‘g‘illarim bo‘lishdi tarqoq,
Murosasiz kelinlardan dod!

Ko‘ngil tinmas bir yerga chiqib,
Biri birin olsa-ya cho‘kib,
Yashayapman bezillab, ko‘rkib,
Murosasiz kelinlardan dod!

Qanotimni qayrivorishdi,
Jigarlarni ayrivorishdi,
Obro‘yimni loyga qorishdi,
Murosasiz kelinlardan dod!

Talashasan nimani, nodon!
Poyingda yer, boshingda osmon,
Bu dunyoda hammamiz mexmon,
Murosasiz kelinlardan dod!

O‘tmish bo‘lsa nima der edi?
To‘rt xotinga bitta er edi,
O‘shalaram "shukr" der edi,
Murosasiz kelinlardan dod!

Asti odam bo‘lisharmikan?
Chiroy ochib ko‘risharmikin?
Axil bo‘lsa o‘lisharsmikan!
Murosasiz kelinlardan dod!

Boshqa uyim bo‘lganda, yo Rab,
Shular bilan yurmasdim yashab,
Ketar edim shu uyni tashlab,
Murosasiz kelinlardan dod!

Yerga kamish, bo‘yrami to‘shab,
Atalami, umochmi oshab,
Cholim bilan yurardim yashab,
Murosasiz kelinlardan dod!

Oyog‘imni -o‘g‘il qilvolsam,
Qo‘llarimni - kelin qilvolsam,
Qilar edi ne ishga solsam,
Murosasiz kelinlardan dod!

Dono kelin eltuzar - ziyo,
Nodon kelin yurtbuzar - balo,
Shularga ham insof ber„ Xudo 
Murosasiz kelinlardan dod!

Bezor bo‘ldim qovoq-qoshidan,
Kechdim qilgan nonu-oshidan,
Xizmatiyam qolsin boshidan,
Murosasiz kelinlardan dod!        

Marhaboxon, boqmay yoshimga,    
O‘lim kelsa qo‘qqis boshimga,
Yozib qo‘ying qabr toshimga:
Murosasiz kelinlardan dod!