AHILLIKGA NЕ YETSIN?

Uch qizdan uch qudam bor,
Nozu firog‘li juda,
Kashf etdim bitta maqol:
Allohdan keyin
- Quda.

Axir, Allohdan ҝeyin,
Turmasmi ota-ona?
Qiz uzatib bildim, yo‘q,
Allohdan keyin
Quda.

Xafa bo‘lmang, otajon
«Sog‘indim», demang, ona,
Shunday kunga qolganman,
Allohdan keyin
quda.

Chunki, uchta «yomon»im,
O‘shalarning qo‘lida,
Aybini kovlashmasin,
Allohdan keyin
Quda.

Maqtab — alqab turaman,
Ora➖kunda telefonda,
Xushomadsiz ish chatoq,
Allohdan keyin
quda.

Katta qizim mehnatga,
Ro‘zg‘orim, deb, dilpora.
Shundan ham ayb topishar,
Allohdan keyin
quda.

Aytaman: «Bolajonim,
O‘zingning esing bor-a?!
Sabr qilgan yutadi»,
Allohdan keyin
quda.

O‘rtanchamning tili tez,
Bir «ish» chiqarmasin➖da,
Topganimni tashiyman,
Allohdan keyin
Quda.

Sim qoqaman: «Jon, qizim,
Uyingdagilar tilla,

«Et» desa, «bet» demagin»,
Allohdan keyin— quda.

Kichik qizim bo‘shangroq,
Har dasturxonim pora.
Osh shulardan aylansin,
Allohdan keyin Quda.

Yuboraman esemes:
«Hilol, tezrok qimirla,
Ishlaring qob ketmasin»,
Allohdan keyin
quda.

Hayit, bayram, tavallud,
Tӳrt tog‘ora ovvora,
Boshqa ish kutib tursin,
Allohdan keyin
quda.

«Qiz uzatdim», desa kim
Deyman: «Voy, voy, bechora,
Kuning endi tug‘ibdi»,
Allohdan keyin
quda.

Muncha «paxta» qo‘yasiz?
Der, bir singlim Dildora,
Qiz uzatsang, bilasan,
Allohdan keyin
Quda.

Bel sog‘mi?
Qo‘shnim so‘rar:
Egilib qolibsiz➖a?
Ta’zimni kӱp qilaman,
Allohdan keyin Quda.

Erim deydi: Qul bo‘lib
Oyog‘iga yotvol➖a,
Deyman: — Qizlar tinchisin,
Alloxdan keyin
Quda.

- Davolanishing kerak,
Buyragingda tosh bor➖a,
- Buyragim kim bo‘libdi?
Allohdan keyin
quda.

Hadis bor: Kim uch qizni
Katta qilib, uzatsa,
Jannati bo‘lar, oh-oh!
Allohdan keyin
Quda.

Shu hadis xurmatidan,
Qul bo‘lish nimaykan-a?!
Tuprok bo‘lsam, roziman,
Allohdan keyin
kuda.

Erim der: Jannat yo‘li
Du‌zaxda-a-an o‘tarkan-da,
Ish qilib, yetvolaylik,
Allohdan keyin
quda.

Qiz boqish bir, tinchitish,
Ming mashaqqat ekan-da,
Boriga shkur, mayli
Allohdan keyin
Quda.

Kulaman: — Dadasi-yey,
Tinib-tinchib ketsin-da,
Qaytib kelsa yaxshimi?
Allohdan keyin
quda.

Tinchlik sharti shirin sӱz,
Murosayu ➖madora,
Ahillikga ne yetsin?
Allohdan keyin— quda.

Kudalarga ham qiyin,
Hamma g‘alva o‘shatda,
Chidashadi shӳrliklar.
Allohdan keyin
quda.

Yaxshimizni oshirib,
Yomonimiz yashirsa,
Nolishimiz ham bormi?
Allohdan keyin
Quda.

«Momoshapaloq» ham yӱq,
Haqdan o‘g‘il boqqanga,
Bizga jannatmi, tamom,
Allohdan keyin
quda.