АҲИЛЛИКГА НЕ ЕТСИН?

Уч қиздан уч қудам бор,
Нозу фироғли жуда,
Кашф этдим битта мақол:
Аллоҳдан кейин
- Қуда.

Ахир, Аллоҳдан ҝейин,
Турмасми ота-она?
Қиз узатиб билдим, йўқ,
Аллоҳдан кейин
Қуда.

Хафа бўлманг, отажон
«Соғиндим», деманг, она,
Шундай кунга қолганман,
Аллоҳдан кейин
қуда.

Чунки, учта «ёмон»им,
Ўшаларнинг қўлида,
Айбини ковлашмасин,
Аллоҳдан кейин
Қуда.

Мақтаб — алқаб тураман,
Ора➖кунда телефонда,
Хушомадсиз иш чатоқ,
Аллоҳдан кейин
қуда.

Катта қизим меҳнатга,
Рӯзғорим, деб, дилпора.

Шундан ҳам айб топишар,
Аллоҳдан кейин
қуда.

Айтаман: «Болажоним,
Ўзингнинг эсинг бор-а?!
Сабр қилган ютади»,
Аллоҳдан кейин
қуда.

Ўртанчамнинг тили тез,
Бир «иш» чиқармасин➖да,
Топганимни ташийман,
Аллоҳдан кейин
Қуда.

Сим қоқаман: «Жон, қизим,
Уйингдагилар тилла,
«Эт» деса, «бет» демагин»,
Аллоҳдан кейин— қуда.

Кичик қизим бўшангроқ,
Ҳар дастурхоним пора.
Ош шулардан айлансин,
Аллоҳдан кейин Қуда.

Юбораман эсемес:
«Ҳилол, тезрок қимирла,
Ишларинг қоб кетмасин»,
Аллоҳдан кейин
қуда.

Ҳайит, байрам, таваллуд,
Тӳрт тоғора оввора,
Бошқа иш кутиб турсин,
Аллоҳдан кейин
қуда.

«Қиз узатдим», деса ким
Дейман: «Вой, вой, бечора,
Кунинг энди туғибди»,
Аллоҳдан кейин
қуда.

Мунча «пахта» қўясиз?
Дер, бир синглим Дилдора,
Қиз узатсанг, биласан,
Аллоҳдан кейин
Қуда.

Бел соғми?
Қўшним сўрар:
Эгилиб қолибсиз➖а?
Таъзимни кӱп қиламан,
Аллоҳдан кейин Қуда.

Эрим дейди: Қул бўлиб
Оёғига ётвол➖а,
Дейман: — Қизлар тинчисин,
Аллохдан кейин
Қуда.

- Даволанишинг керак,
Буйрагингда тош бор➖а,
- Буйрагим ким бўлибди?
Аллоҳдан кейин
қуда.

Ҳадис бор: Ким уч қизни
Катта қилиб, узатса,
Жаннати бўлар, оҳ-оҳ!
Аллоҳдан кейин
Қуда.

Шу ҳадис хурматидан,
Қул бўлиш нимайкан-а?!
Тупрок бўлсам, розиман,
Аллоҳдан кейин
куда.

Эрим дер: Жаннат йўли
Ду‌захда-а-ан ўтаркан-да,
Иш қилиб, етволайлик,
Аллоҳдан кейин
қуда.

Қиз боқиш бир, тинчитиш,
Минг машаққат экан-да,
Борига шкур, майли
Аллоҳдан кейин
Қуда.

Куламан: — Дадаси-ей,
Тиниб-тинчиб кетсин-да,
Қайтиб келса яхшими?
Аллоҳдан кейин
қуда.

Тинчлик шарти ширин сӱз,
Муросаю ➖мадора,
Аҳилликга не етсин?
Аллоҳдан кейин— қуда.

Кудаларга ҳам қийин,
Ҳамма ғалва ўшатда,
Чидашади шӳрликлар.
Аллоҳдан кейин
қуда.

Яхшимизни ошириб,
Ёмонимиз яширса,
Нолишимиз ҳам борми?
Аллоҳдан кейин
Қуда.

«Момошапалоқ» ҳам йӱқ,
Ҳақдан ўғил боққанга,
Бизга жаннатми, тамом,
Аллоҳдан кейин
қуда.