Биринчи миллиардерлар оиласи: Рокфеллерлар ҳақида 10 та факт

20 март куни дунёдаги энг кекса миллиардер, биринчи Рокфеллер миллиардерининг набираси Девид Рокфеллер вафот этди.

Сулола асосчиси Уилям Рокфеллер (1810-1906) анча шов-шувли обрўга эга эди. У ёғоч ишлаб чиқарувчи бўлиб ишлаган, кейин эса тиббий маълумотга эга бўлмаганига қарамай саёҳат қилиб, ўз дори-дармонларини сотишни бошлаган. 1849 йилда у уй бекасини зўрлашда айбланган.

Уилямнинг ўғли Жон Дависон Рокфеллер (1839–1937) 1870 йилда Стандард Оил компаниясига асос солган. Айнан шу бизнес Рокфеллерни дунёдаги биринчи доллар миллиардерига айлантирган.
1911-йилда АҚШ Олий суди монополияга қарши қонунбузарликлар туфайли компанияни тарқатиб юборишга қарор қилди. У 34 та компанияга бўлинган бўлиб, уларда Рокфеллерлар муҳим рол ўйнашда давом этишди.

Жон Дависон Рокфеллер ҳаётининг кўп қисмини хайрия ишларига ўтказган. Рокфеллер жамғармаси ҳали ҳам мавжуд ва АҚШдаги энг йирик фондлардан бири ҳисобланади. Турли ҳисоб-китобларга кўра, америкалик тадбиркор ўз бойлигининг ярмидан кўпини хайрия ишларига сарфлаган.

Жон Дависон Рокфеллер 16 темир йўл компаниясига, олтита пўлат компаниясига, тўққизта кўчмас мулк фирмасига, олтита юк ташиш компаниясига, тўққизта банкка ва учта апельсин боғига эга эди.

Жон Дависон Рокфеллер сулоласининг вориси унинг ягона ўғли кичик Жон Девиссон (1874–1960) бўлиб, отасининг бойлигини янада кенгайтирган. Бунга иккита жаҳон уруши ёрдам берди, бу эса ёқилғи таъминоти билан шуғулланган оилага катта даромад келтирди.

1930-йилларда Рокфеллерлар оиласи Нью-Йорк шаҳрида Рокфеллер маркази деб номланувчи йирик офис мажмуаси қурилишини молиялаштирди. 1987 йилда мажмуа миллий диққатга сазовор жой сифатида белгиланди. У 1933 йилдан бери марказ биноларидан бирининг ташқарисида ўрнатилган анъанавий Рождество арчаси билан ҳам машҳур.

Кичик Жон Девиссон олти фарзандига — бир қизи ва беш ўғлига катта бойлик қолдирган. Унинг ўғилларидан бири Нелсон 1974 йилдан 1977 йилгача Жералд Форд қўл остида АҚШ вице-президенти лавозимида ишлаган.

Кичик Жон Девиссоннинг сўнгги фарзанди Девид Рокфеллер 2017-йилнинг 20-мартида 101 ёшида вафот этди.Девид кўплаб аждодлари сингари хайрия ишлари билан машҳур эди. 2008 йилда у Гарвард университетига 100 миллион доллар хайрия қилди. Унинг бутун умри давомида берган хайриялари 900 миллион долларга баҳоланган.

2002 йилда Девид Рокфеллер китоб нашр этди ва шу тариқа тарихда ўзининг таржимаи ҳолини нашр этган Рокфеллерлар оиласининг ягона аъзоси бўлди.