Тушда узук курса нима булади

УЗУК (АНГУШТАРИЙ) Дониёл (а.с.)нинг айтишларича, нақшли чиройли узукни кўрса, узук соҳибидан унга хайрият ва яхшилик етишига далилдир. Агар бир киши унга узук бериб, узукка муҳр қилишини сўраса, нимаики унга лойиқ бўлса, ўшани топади, яъни подшоҳликка лойиқ бўлса, подшоҳлик топади, бой бўлса мол топади. Бу эса узукнинг қадр-қимматига мувофиқ бўлади. Агар масжидда ёки намозда ёки ғазовотда кимдир унга узук берганини кўрса, у кишп зоҳид ва обидлардан бўлади. Агар савдогар бўлса тижоратдан фойда насиб бўлишига далилдир.

Агар подшоҳ узук берганини кўрса, подшоҳ мамлакатидан унга беришига далилдир.

Ибн Сирин (р.а.) айтадики, агар бирор киши узуги йўқолиб қолганини ёки ўғри ўғирлаб кетганини кўрса, унинг ишларида офат ва қийинчиликлар юз беришига, агар узуги синиб қолиб, бироқ кўзи омон қолганини кўрса, иззат ва обрўйи яхшиланиши ҳамда қадр-қиммати жойида бўлишига далилдир. Агар узугини бировга берса, қўлидаги молу дунёсининг бир қисмини ўша одамга бағишлайди. Агар узукни сотганини ва пулини олганини кўрса, қўлида бор нарсани тўлиқ сотиши ва қўлдан чиқаришига далилдир. Агар пулини олмаса, нарсаларининг бир қисмини сотади. Агар узугининг чиройи ўзига ёқмаётганини кўрса, қўлидаги молидан бир қисми йўқ бўлади ва подшоҳ унга ғазабини сочишига далилдир. Узугининг кумушдан эканини кўрса, топган нарсаси ёқимли ва ҳалол бўлишига далилдир. Агар узугининг олтиндан эканини кўрса, топган нарсаси макруҳ ва ҳаромдан ҳосил бўлишига далилдир. Узугининг пўлатдан эканини кўрса, топиши оз ва арзимас бўлишига далилдир. Агар узуги қўрғошиндан эканини кўрса, пўлат узук ҳақидагиларга далилдир.

Жобир Мағрибий (р.а.) айтадики, агар бармоғида пўлат узукни кўрса, кучли ва қудратли бўлишига далилдир. Агар бронза ёки мисдан эканини кўрса, тагипаст одамлардан фойда топишига далилдир. Агар узутини биллурдан эканини кўрса, оддий оммадан бирор нарса топишига далилдир. Агар узугини кумушдан эканини кўрса, бирор ердан унга нарса етишига далилдир. Агар ўз узугини бировнинг қўлига омонат топширса ёки ҳадя қилиб юборса ва у киши узугини қайтариб берса, бирор хотинни ни? коҳига олмоқчи бўлгани ва бу ҳохишни ижобат қилинмаслигини ва унга бу хотинни бермасликларига далилдир. Агар ўз узугини синдириб қўйганини кўрса, ўзи билан хотини орасида жудолик юз беришига далилдир. Агар узукнинг икки кўзли эканини кўрса ва икки кўзидан биттаси тушиб кетганини кўрса, иккита гуноҳ қилиб, биттасига тавба қилишига далилдир. Агар хат ёзганини кўрса ва хатга ўз узуги билан муҳр босса, пинҳоний нарсадан унга бирор насиба етишига далилдир. Агар очиқ турган хатга муҳр босса, яширин бўлмаган бирор нарса унга етишига далил бўлади.

Жаъфар Содиқ (р.а.) айтадики, тушдаги кумуш узук тўрт нарсани билдиради: мамлакатни; хотинни; фарзандни; молни.
Олтин узук яхшиликка далилдир. Агар аёл киши кўзли узугини йўқотиб қўйганини кўрса, унинг обрў-эътибори кетишига, балки фарзанди ўлишига ёхуд моли тарон-тарож бўлишига далил бўлади. Кўзли узугини йўқотган киши ҳоким бўлса, ҳокимликдан тушади. Агар буни аёл кўрса, эри ёки фарзанди ўлади.