Тушда сарой курса нима булади

САРОЙ (САРОЙ) Дониёл алайҳиссаломнинг айтишларича, агар тушида бегона бир саройга кириб қолганини, бу ерда ҳеч кимни танимаслигини ва саройда мурдалар юрганини кўрса, бу охират саройи эканини ва ажали яқин эканига далилдир. Агар саройга киргани ва яна қайтиб чиқканини кўрса, касал бўлиши, ўлишига яқин қолиши ва яна шифо топишига далилдир. Агар таниш саройга киргани, сарой лойдан бунёд қилинганини кўрса, ҳалол ризқ топишига далилдир. Агар саройнинг пишиқ ғипгг ва ганжлардан қилинганини кўрса, ҳаром мол топишига далилдир.

Агар бу саройдан чиққанини кўрса, ҳаромдан тавба қилишига далилдир. Агар кенг ва катта саройга кириб қолганини кўрса, ризқи кенг бўлишига далилдир. Агар саройни кичик ва тор эканини кўрса, юқоридагининг аксидир.

Агар тушида кенг ва катта саройни кўрса, сарой ичида кўшк ва айвонлар бўлса, охират саройида шараф ва иззат топишига далилдир, бироқ унинг мавзеига мусибат етади. Агар ўша сарой синганини ёки куйганини кўрса, сарой соҳибига мусибат етишига далилдир. Агар сарой ери катта ва кенг бўлиб қолганини кўрса, кенглиги микдорича дунё ризқи унга кенг бўлишига далилдир, агар бунинг аксини кўрса, ризқ унга тор бўлишига далилдир. Агар унинг саройини кавлашаётганини кўрса, намоз ва ибодатни кам қилаётганига далилдир. Агар эски бир саройни қулаётганини кўрса, яхшиликлар эшигининг очилишига ва шод бўлишига далилдир. Агар янги ва озода бир саройга кирганини кўрса, агар бой бўлса, моли зиёда бўлишига, агар камбағал бўлса, бой бўлишига далилдир.

Кирмонийнинг айтишича, агар янги сарой ўртасида турганини кўрса, қизи ёки опа-синглиси келишига далилдир. Яна унинг айтишича, сарой ичидаги суппа ота ва онага далолат қилади.

Агар саройининг суппаси янги ва озода эканини кўрса, ота ва онасининг тандуруст бўлишига далилдир.
Жобир Мағрибийнинг айтишича, кимки тушида катта ва озода саройга кирганини ва бу сарой ўзиники эканини кўрса, ризқи кенг бўлиши, иззат ва обрў топиши, чиройли хотин олиши ва амал топишига далилдир. Агар бу тушни аёл киши кўрса, бой эркакка тегишига далилдир.

Ҳазрати Содиқ (р.а.)нинг айтишича, тушда сарой кўриш саккиз нарсага далил бўлади: эркак учун хотинни, хотин учун эркакни; бадавлатлиликни; омонлик; яхши ҳаётни; молни; амални; иззатни; омонатни.