Тушда коплон курса нима булади

ҚОПЛОН (ЮЗ) Ибн Сирин (р.а.)нинг айтишича, тушдаги қоплон душмандир. Тушида қоплон билан жанг қилганини ва уни енгганини кўрса, душман устидан ғалаба қилишига далилдир.

Кирмоний (р.а.)нинг айтишича, тушида қоплонни тутиб олганини кўрса, душман билан суҳбат қуришига далилдир. Агар қоплон унинг қўлидан қочганини кўрса, душман ундан қочишига далилдир. Тушида кўпгина қоплонлар унга итоаткор эканини кўрса, душманлари забун бўлишларига далилдир.

Жобир Мағрибий (р.а.)нинг айтишича, тушида қоплон гўштидан еганини кўрса, унинг микдорича душман молига эга бўлишига далилдир. Баъзи таъбирчиларнинг айтишича, тушида қоплонни ўлдирганини кўрса, бунда ҳеч қандай манфаат йўқ. Тушида қоплонни елкасига олганини кўрса, душман юкини кўтаришига далилдир. Тушида қоплонлар унинг уйида ёки бирорта жойда қичқираётганларини кўрса, душманлар сабабли ранж ва зиён кўришига далилдир.

ҚОПЛОН (ПАЛАНГ) Ибн Сирин (р.а.)нинг айтишича, тушдаги қоплон кучли ва қудратли душманни билдиради. Агар қоплон билан жанг қилаётганини кўрса, ўз душмани билан хусуматлашади ва унинг душмани музаффар бўлади, яъни қоплон унинг устидан ғалаба қилса, демак, душман унинг устидан ғолиб келади. Агар у қоплон устидан ғолиб келса, демак, душман устидан ғалаба қилади. Агар қоплоннинг гўштидан еяётганини кўрса, жангу жанжалга қолишини билдиради, лекин зафар қазониб, шараф ва улуғлик топади.

Кирмоний (р.а.) айтадики, қоплоннинг устига минганини кўрса, иззат ва обрўйининг ошишига ва душманга қаҳр қилишига далил бўлади. Агар қоплон билан жанг қилаётганини, бироқ ҳеч бири ғолиб келолмаётганини кўрса, подшохдан катта хавф етиши ёки оғир касаллик юз беришига далил бўлади, бироқ ундан шифо топади. Агар қоплоннинг устидан учаётганини кўрса, душмандан хавф етишига ва оқибатда бу хавфдан қутулишига далил бўлади. Агар қоплоннинг терисини ёки суягини ёки юнгини қўлга кириттан бўлса ёки кимдир унга берганини кўрса, душман молини ўша топган нарсаси микдорича топишини билдиради. Агар қоплонни ўлдирганини кўрса, исломдан юз ўгиришини ва ундан ҳеч қандай хайрият йўқлигини билдиради.
Жаъфар Содиқ (р.а.) айтадики, тушда қоплонни кўрмоқ уч нарсани билдиради: кучли душманни; душмандан мол топишини; подшоҳдан етадиган хавфни.