Тушда бурун курса нима булади

БУРУН (БИНИЙ) Дониёл (а.с.)нинг айтишларича, тушдаги бурун туш кўрувчининг обрў-эътиборига далилдир, бурунда кўрилган камлик ёки ортиқчалик кўрувчининг қадру эътиборига далилдир. Агар бурунининг қисқариб қолганини кўрса, обрўэътиборига етадиган нуқсонга далилдир. Агар бурнининг ўз жойидан тушиб кетганини кўрса, обрў-эътибордан тушишини билдиради. Агар бурун тешикларининг кенгайиб қолганини кўрса, маишати соз бўлишини билдиради, агар торайиб қолганини кўрса, маишати тор бўлишини билдиради.

Ибн Сирин (р.а.)нинг айтишича, бурнидан миясининг оқиб чиқаётганини кўрса, бир улуғ кишидан манфаат топишини билдиради. Агар бурнидан бирор жониворнинг чиққанини кўрса, масалан, қурт, пашша ва шунга ўхшашларни, фарзанд туғилишига далилдир. Агар бурун учи бекилганини, чунончи, нафас ололмаётганини кўрса, ишлари юришмай қолишига далил бўлади. Агар бурнидан гапираётган бўлса, давлати қўлдан кетишига далил бўлади. Агар бурун учи терисининг тушиб кетганини кўрса, унга зиён етишини билдиради.

Жобир Мағрибий (р.а.) айтадики, тушда ҳар ким бурнидан қон оқаётганини кўрса ва таъбирчига, мен туш кўрдим, тушимда бурнимдан қон оқаётган эмиш, деб айтаётган бўлса, жуда кўп мол топишига далилдир. Агар ҳар ким бурнининг икки тешигини битта бўлиб қолганини кўрса, оқила бир аёл билаш қовушмоғини билдиради. Агар бурнининг учи кесилганини кўрса, ўғлини хатна қилишига далилдир. Баъзиларнинг айтишича, унинг обрў-эътиборига нуқсон етади.

Жобир Мағрибий (р.а.) айтадики, агар бурнидан ёқимсиз бир нарса чиққанини кўрса, ғазабга далилдир. Агар бурнидан қон чиққанини ва бундан жумла тани қонга бўялганини кўрса, қўлига ҳаром мол тушишига далилдир. Агар бурнидан яшил қон тушса ва у озгина бўлса, боланинг она қорнидан тушишига далилдир. Баъзи таъбирчиларнинг фикрига қараганда камбағал бўлади. Агар бурнидан қон оқаётганини кўрса, бироқ тани қонга бўялмаган бўлса, боласи ёки хотинини уйдан ҳайдаб чиқаришига ёки уларга бирор зарар етишига далилдир. Агар бурнининг ерга узилиб тушганини кўрса, қиз туғилишига далилдир.

Агар бурнини юваётганини кўрса, бирорга эркак унинг хотинига фириб беришига далилдир. Агар бурнидан бир қушнинг чиқиб кетганини кўрса, чорваси бўлса, бола туғишига далилдир. Таъбирчилардан баъзиларининг фикрига қараганда бурундан қон кетиши яшаб турган диёридаги подшохдан мол етишига далилдир.

Исмоил Ашъас (р.а.)нинг айтишича, агар бурнини хартум каби катта бўлиб кетганини кўрса ёки хартумдан кичикроқ эканини кўрса ҳам, буруннинг катта-кичиклигига қараб, иззат ва обрўси ошишини ва бундан қариндошуруғлари ҳам манфаатдор бўлишини билдиради. Агар бурнидан ҳид келаётган бўлса, яхши фарзанд туғилишига далилдир. Агар бурнидан нохуш ҳид келаётган бўлса, таъбири юқоридагининг аксидир.

Ҳофиз айтадики, тушида бурнининг йўқ эканини кўрса, қариндошлардан бирининг ўлишига далилдир. Агар иккита бурни борлигини кўрса, хотини билан ўзи ўртасига мухолифлик тушишини билдиради. Агар бир киши унинг бурнига хушбўй ҳидли нарсани тутганини кўрса, ўша кишидан фойда топишига далилдир. Агар тушни аёл киши кўрса, ундан солиҳ фарзанд туғилишига далилдир. Агар бир киши унинг бурнига нохуш ҳидли нарса
тутаётганини кўрса, ўша кишининг ғазабига дучор бўлишини билдиради.

Жаъфар Содиқ (р.а.)нинг айтишича, тушда бурун кўрмоқ беш нарсага далилдир: иззатга; молга; улуғликка; фарзандга ва маишатга.