Ҳомиладор аёл грипп бўлса...

– Ҳомиладорман. Ҳозирда грипп билан оғриб, қийналяпман. Бирор дори ичсам бўладими?

– Бир қарашда оддий туюлган шамоллаш ва грипп касалликлари ҳомиладорликда каттагина муаммога сабаб бўлиши мумкин. Аммо бу даврда шамоллашга қарши дори ичиш хавфли.

Кўпчилик грипп аломатларини шамоллашдан фарқлай олмайди. Тана ҳароратининг бирданига 38 даража ва ундан ортиқ кўтарилиши, қуруқ йўтал,  тумов, қўл-оёқ мушакларида оғриқ, эт увишиши ва қалтираш безовта қилса, бош оғриб, тана зирқираса, ҳолсизлик, иштаҳа йўқолса, билингки, бу грипп аломати.
Бундай пайтда дарҳол дори ичишга шошилманг. Аввал шифокор тавсияси зарур. Негаки ҳомиладорликдан олдин қабул қилинган дорилар самарали бўлса-да, энди сизга мумкин эмас. Шунинг учун, яхшиси, терапевт кўригига боришингизни маслаҳат бераман.

Агар грипп ҳомиладорликнинг биринчи уч ойлигида кузатилса, 10-13 ҳафталигида ҳамда иккинчи уч ойликнинг 14-20 ҳафталигида пренатал скринингдан ўтиш лозим.

***

– Ҳомиладор аёл грипп билан оғриса, қайси пайтда «Тез ёрдам» чақириши зарур?

– Агар грипп билан касалланган ҳомиладор аёлда қуйидаги ҳолатлар кузатилса, дарҳол “Тез ёрдам” чақириш лозим:

- ҳушини йўқотса;

- тиришиш (судорога) кузатилса;

- ҳансираш ва нафас олиш қийинлашса;

- тананинг қаерида бўлмасин, кучли оғриқ сезилса;

- тумов ёки шамоллаш аломатлари бўлмаса-да, томоқ оғриса;

- бош оғриб, қайт қилса;

- томоқ шишиб кетса;

- терига тошмалар тошса.

Унутманг, тана ҳарорати 39°С бўлса, унга қарши дори ичилгач, ҳарорат 30 дақиқадан сўнг меъёрлашиши керак. Агар иситма қалтираш, оқариш, кўп терлаш билан кечаётган бўлса, шифокор кўриги зарур.Одатда, грипп 4-куни чекиниши лозим. Борди-ю, бундай бўлмаса, шифохонага бориш шарт.

– Ринитни тез даволаш мумкинми? Бунинг учун нималарга эътибор бериш керак? Шу ҳақида маълумот берсангиз.

– Ринитни тез даволашнинг кўплаб усуллари мавжуд. Aммо касалликни бир кунда даволаш осон иш эмас. Бу тумовнинг тури, касаллик қанча давом этгани, беморнинг ёши ва унинг иммунитетига боғлиқ.

Айримларда касаллик кўп даволанмасдан, бир кунда ўз-ўзидан ўтиб кетади. Бошқалар эса қилинган ҳаракатларга қарамай, шифо топмайди ва ринит сурункали турга ўтади.

Касалликни тез даволаш учун кун давомида вақти-вақти билан бурун йўлларини тозалаш керак. Aммо эсингиздан чиқмасин – сиз бир вақтнинг ўзида иккита бурун тешигини қоқа олмайсиз. Негаки шилимшиқнинг синусларга тушиши натижасида гайморит келиб чиқади. Шунинг учун аввал битта бурун тешигини, кейин эса бошқасини тозалаш лозим.

Бурунни қоқиш учун бир марта ишлатиладиган қоғоз салфеткадан фойдаланган маъқул. Оддий мато ёки рўмолча мумкин эмас, чунки уларнинг устига бактериялар тўпланади.

Ҳар қандай шамоллашда бўлгани каби ушбу хасталикда ҳам кўп миқдорда сув истеъмол қилиш зарур.