Тушда буйин курса нима булади

БЎЙИН (ГАРДАН) Дониёл (а.с.)нинг айтишларича, тушдаги бўйин омонат ҳамда дин жойидир. Агар тушида бўйни йўғон бўлиб қолганини кўрса, омонатни жойига қўйиш, диннинг созлиги ва диёнатни сақлаш қувватини билдиради. Тушида бўйни калта ва заиф эканини кўрса, омонатни жойига қўйиш учун заиф эканига далилдир. Агар тушида илон унинг бўйнига ўралиб олганини кўрса, мол закотини бермаслигига далилдир. Аллоҳ таъоло айтади: . . . Қиёмат куни бахиллик қилган нарсалари (ўз бўйинларига) бўйинтуруқ қилиб илиб қўйилади. . . (Оли Имрон сураси, 180-оят).

Агар тушида бўйнида ҳеч нарса бўлмагани ҳолда бўйнининг оғир эканини кўрса, бемор бўлишига далилдир. Тушида бўйнида нарса борлигини, бироқ унинг оғирлигини сезмаётганини кўрса, динининг созлиги ва умрининг узун бўлишига далилдир.

Кирмоний (р.а.)нинг айтишича, тушида бўйнининг йўғон ва кучли эканини кўрса, омонатни жойига қўйишига ва ишлари мустаҳкам бўлишига далилдир. Агар бўйнининг узун бўлиб қолганини кўрса, омонат унинг бўйнида узоқ қолишига далилдир.

Агар бўйнини калта бўлиб қолганини кўрса, омонатни бўйнидан тез туширишига далилдир. Агар тушида бўйнини қора эканлигини кўрса, омонатга хиёнат қилишига далилдир. Агар бўйнининг синганини кўрса, ўз мақсадидан узоқлашишига ва динига нуқсон етишига далилдир, зеро диндан кўра улуғроқ омонат йўқ. Агар бўйнини калта кўрса, омонатга хиёнат қилишига далилдир. Агар буйнида мўй кўрса, омонатни жойига қўйишда қарздор бўлишига далилдир. Агар бўйнидаги мўйни қириб ташлаганини кўрса, карзидан қутилишига далилдир. Агар бўйин гўштининг қирқилганини кўрса, ўзида бўлган бировнинг молини йўқотишига далилдир.

Мағрибий (р.а.)нинг айтишича, агар тушида бўйин гўштини еганини кўрса, таъбири аксинча бўлади. Агар тушида бировнинг бўйнида ўтирганини кўрса, душман устидан зафар топишига далилдир.

Жаъфар Содиқ (р.а.)нинг айтишича тушда бўйнини кўриш беш нарсага далилдир: омонатга; қувватга; хиёнатга; қарзга ва беморликка.