ЭРКАК НИМАЛАРНИ ИСТАЙДИ?

   Аёллар ўзининг жуфту ҳалолига ёқишга ҳаракат қилишади. Қизиғи шундаки, бу мақсад йўлида ҳар бир аёлнинг ўзига хос усули бор. Аммо ҳамма вақт ҳам бу усул кўзланган мақсадга эришишга ёрдам бермаслиги мумкин. 

Айниқса, аёлнинг ҳар қанча уринишларига қарамай, турмуш ўртоғи унга нисбатан бепарво бўлса, оила бекаси ўзига-ўзи: «Унга нима керак ўзи?» деган саволни беради. Қуйида эркаклар нималарни исташи ҳақида қисқача маълумот берамиз. Аёллар бу маслаҳатларга тўлиқ амал қилган ҳолда оилани мустаҳкамлаб олишлари мумкин. 

ҲУРМАТ ҚИЛИШ

 Эркакни ҳамиша ҳурмат қилиш лозим. Баъзи аёллар эса унга акс муносабатда бўлишади. Шу боис эркак «сина» бошлайди. Топиш-тутиши кам бўлишига қарамай, оилада ҳурмат қилинадиган эркакнинг фикри тиниқ, оилага меҳр-муҳаббати баланд ва серғайрат бўлади.
ИШОНЧ БИЛДИРИШ

 Аёлларнинг энг нозик жиҳати мана шунда, десак адашмаган бўламиз. Сабаби, турмуш ўртоғи одатдаги вақтдан бироз кечикиб келса ёки ундан аёлларнинг атири ифори уфуриб турса бас. Унга: «Қаерда, ким билан эдингиз?» деган савол берилиши аниқ. 

 Аслида эркак бу пайтда ишда ушланиб қолиб, оиласи учун меҳнат қилаётган бўлиши мумкинлиги аёлнинг хаёлига ҳам келмайди. Балки у ўзи билан бирга ўқиган синфдоши ёки курсдошини, борингки, аввалги ҳамкасбини учратиб қолиб, бироз суҳбатлашгандир... 

 Энг ёмони, кўча эшикдан кирган эркакни очиқ чеҳра билан ҳурмат қилиб кутиб олиш ўрнига, уни саволлар билан қарши олишдир. Бундай муносабат, аниқроғи, ишончсизлик эркак кишининг аёлидан кўнгли совушига олиб келади. 

 Ишончсизлик аёлларни турли шубҳа ва гумонлар сари етаклайди. Шу боис у турмуш ўртоғининг телефон аппаратидаги ёзишмаларини, кимларга қачон қўнғироқ қилгани-ю, кимлар билан интернетда гаплашганини текширишга одатланиб қолади. Бу одатни ташлашнинг йўли осон. Бу пайтда ҳар бир аёл ўзига-ўзи: «Худди шу ишни турмуш ўртоғим менга нисбатан қўлласа, нима бўлади?», деган саволни бериши керак.

ҚЎЛЛАБ-ҚУВВАТЛАШ

 Баъзан эркак бирор иш бошлашдан олдин аёли билан маслаҳатлашгиси келади. Бироқ аёлининг: «Эй, қўйсангиз-чи, бу иш сизнинг қўлингиздан келмайди», деган гапи эркакнинг ҳафсаласини пир қилади, шаштини туширади. Аксинча, бу пайтда, ҳаттоки турмуш ўртоғининг бу ишга қодир эмаслигини билган тақдирда ҳам оқила аёл унга ишонч билдириб, бошламоқчи бўлган ишини қўл­лаб-қувватлаши зарур. Шунингдек, унга фойдали маслаҳатлар берса, эркакнинг аёлига ҳурмати ортади. 

ТУШУНИШ

 Эркак асаббузарликларни дўстлари билан биргаликда чойхонада ош дамлаб, бир дас­турхон атрофида суҳбатлашиб, унутишга ҳаракат қилади. Баъзан саунага боради, баъзан тоғ қўйнига чиқиб, очиқ ҳавода дам олади. Эркакнинг тез-тез дам олишга кетишини тўғри тушуниш керак. Ахир у оиласи учун меҳнат қилади, шу боис у ҳам дам олишга ҳақли. 

МАҚТАШ

 Эркак ҳам ёш бола сингари мақтовни хуш кўради. Чунки у болалигидан онасининг эркалашларига ўрганиб қолган. Яхши гап эшитган эркак ўзининг ана шундай мақтовга муносиб эканидан, муҳими, аёли уни тушуна олганидан хурсанд бўлади. 

 Оддий ҳолат: турмуш ўртоғингиз кечқурун ишдан келгач, йиғилиб қолган ахлатни олиб чиқиб ташлади. Сиз бу пайтда унга: «Қандай яхши инсонсиз, чарчаб келган бўлсангиз ҳам менга ёрдам бердингиз», денг. Шунда унинг кайфияти нечоғли кўтарилганига гувоҳ бўлишингиз мумкин. У мақтов соғинганида ўз-ўзидан сизга ёқишга ҳаракат қилишини ҳам унутманг!

ҲАММАСИ ЎЗ ВАҚТИДА БЎЛИШИ

 Эркак ҳамма нарса белгиланган вақтда бажарилишини истайди. Шу боис, энг аввало, унинг овқатини ўз вақтида тайёрланг. Кийимларини ҳам ювиб-дазмоллаш эсдан чиқмасин. Унинг бирор жойга кечикиб боришига бу юмушларни ўз вақтида бажармаганингиз сабаб бўлиб қолмасин, тағин.

ЖОЗИБА

 Эркак чиройли ва ўзига оро берган аёлларни хуш кўради. Шундай экан, турмуш ўртоғингизни қарши олишдан аввал ўзингизга вақт ажратиб, жозибали кўринишга ҳаракат қилинг. Бу одат унинг бошқа аёлларга эътибор қаратиши ёки ўзгага кўнгил қўйишидан сақлайди.