Онанинг қуйидаги касалликларида эмизиш тавсия этилмайди

Онанинг қуйидаги касалликларида эмизиш тавсия этилмайди:

• Буйрак етишмовчилигида;
• Туғма ёки орттирилган юрак парогида;
• Эндокардит ва миокардитда;
• Базедов касаллигида;
• Хавфли ўсмаларда;
• Ўткир руҳий касалликларда.

Онада силнинг актив шакллари бўлганда бола эмизиш мумкин эмас. Бола 1,5-2 ой онадан узоқлаштирилади ҳамда бу вақтда бола эмланиб силга қарши иммунитет ҳосил қилинади. Эмизиш онадан соғиб олинган сут билан давом эттирилади.
Бундан ташқари, она эмизикли даврда грипп, ўпка шамоллаши, қизамиқ, қизилча, куйдирги, қоқшол, терлама каби касалликлар билан касалланиб қолса, қуйидаги махсус чоралар кўрилади.

Грипп, ўпка шамоллаганда – она оғзига ниқоб таққан ҳолатда эмизиш мумкин. Эмизишдан сўнг бола онадан алоҳида хонага ўтқазилади;
Қизамиқ, қизилча бўлганда – эмизишни давом эттириш мумкин. Лекин, бир вақтнинг ўзида болага педиатр назорати остида гамма-глобулин киритилади;
Куйдирги, қоқшолда эмизиш буткул тўхтатилади ва бошқа аёл сутидан фойдаланилади;

Тошмали ва қайталама терламанинг оғир ҳолатида кўкрак билан эмизиш вақтинчалик тўхтатилади. Енгил ҳолларда эса соғибқайнатилган сут билан эмизиш давом эттирилади.

Юқорида санаб ўтилган ҳолатлар аёлда кузатилганда тегишли чоралар кўрилиши зарур. Бу ҳолатлар кузатилганда нафақат ўзингизни, балки болангиз саломатлиги учун ҳам шифокор (Педиатр, оилавий шифокор) назорати остида бўлишингиз лозим.